Tinirintas na hexanut na kalambigi (pulseras) / Braided hexanut bracelet

Marami na'kong nakikitang DIY ng ganitong klase ng pulseras kaya naman naengganyo din akong gumawa para sa mga kaibigan ko. Nakailang subok din muna ako bago ako nasiyahang sumulat ng tungkol sa paggawa nito. Subok lang ng subok hanggang maging perpekto din ang ginagawa natin, 'di ba?

Napakatipid ng ganitong pulseras pero ang ganda ng kinalabasan nya. Kumbaga ay upgraded na bersyon ng friendship bracelet. Nakuha ko ang hexanuts ko sa halagang P0.50 isa sa malapit na hardware sa'min. Kung ano'ng sukat nito ay hindi ako sigurado. Sinabi ko lang na gusto ko yung pinakamaliit na meron sila. Tinanong ng tindera kung para saan ko gagamitin ang ganun kadaming hexanuts at nung sinabi ko na para sa pulseras ay para bang namangha siya.

Ang mga materyales na ginamit ko dito ay 12 pirasong hexanuts, mga 3 yardang yarn, at pang-gantsilyo.

Paraan ng paggawa:

1. Dahil masyadong manipis ang yarn na nabili ko kaya naisip kong mag-gantsilyo ng isang yardang yarn. Tatlong magkakahiwalay na tig-iisang yarda ang ginantsilyo ko saka ko sila binuhol sa isang dulo at tinirintas.

2. Matapos makapag-tirintas ng mga dalawang pulgadang haba ay saka isingit ang isang hexanut kada tirintas ng isang strand.

3. Matapos maisingit sa pagtitirintas ang mga hexanuts, ituloy lang ang pagtirintas hanggang makaabot sa gustong haba ng pulseras. Sa dulo ng tirintas ay buholin ito.

4. Pagpatungin ang mga sobrang hibla sa bawat dulo ng pulseras.

5. Inipit ko ang mga ito gamit ang mga 6 na pulgadang haba ng yarn. Ginamit ko ang tatted bar knot dito. Ang bawat grupo ng nakalawit na hibla ng yarn ay buhulin.

Halimbawa ng paggawa ng tatted bar knot. (O kaya tignan ang larawang ito.)

7. Matapos gawin ang tatted bar know, maaari ng hatakin ang magkabilang lawit ng yarn para masikipan ang pulseras sa kamay.

Napakadali ng DIY na ito at siguradong magiging patok din sa iyong mga kaibigan. :)

Cellphone pouch / Lalagyan ng cellphone

Minsan kapag mamamalengke ako, gusto ko lang ng isang maliit na paglalagyan ng cellphone at pera ko. Yung tipong nakasabit lang sa kamay ko o kaya naman yung madaling isiksik sa bulsa ng shorts ko. Kaya heto, gumawa ako ng cellphone pouch na kakasya din naman ang pera at may hawakan sya na pwede isuot sa kamay.

Nahihilig ako sa paglalagay ng lining sa mga tinatahi kong bag o pouch na kagaya nito. Para sa'kin mas malinis tignan yung bag o pouch kapag may lining sya. Mas matrabaho pero sulit naman.

Ang mga materyales na ginamit ko dito ay dalawang uri ng tela at velcro. Mas maganda kung yung dalawang magkaibang tela ay halos magkapamilya naman sa kulay. Pero kung solid naman ang kulay ng mga tela, maaaring magkapareho ng hues o kaya naman ay magkasalungat sila ng mga kulay.

Paraan ng paggawa:

1. Nilapat ko ang cellphone ko sa tela para pag-basehan ng sukat. Mga anim na pulgada palapad at mga labindalawang pulgada pahaba (kasama na ang mga palugit para sa pagtatahi).

2. Bago ko tinahi ang mga tela, pinwesto ko muna ang mga velcro para yung ilalim na tahi ay hindi kita sa finish product. Para magawa ito, paglapatin muna ang mga tela sa kung paano ang magiging itsura nila pag tapos na. Saka markahan ang pupwestuhan ng mga velcro. Hindi ko alam kung may patakaran sa pagpwesto sa mga velcro pero naisip kong mas maiging nasa taas yung magaspang na velcro at sa baba yung malambot para mas madaling buksan.

3. Pagkatahi ng mga velcro ay pagharapin ang mga tela para ang nakikita natin yung likurang parte nila. Saka ito tahiin sa gilid pero iwanang hindi nakatahi ang isang gilid nito para may butas tayo sa pagbaliktad ng tela.

Kapag nabaligtad na ang tela, itiklop paloob yung parteng butas saka tahiin (gaya ng closeup na'to).

4. Tahiin ang handle (2 inches ang kapal at mga 6 inches ang haba). Tiklupin ang tela ng pouch na ang nakikita sa labas ay yung lining. Tahiin ang parehong gilid pero mag-iwan ng mga 2 pulgada sa isang gilid para maisiksik dito yung hawakan. Isabay sa tahi ng natitirang 2 pulgadang gilid yung hawakan.

Ayan, may pouch na tayo para cellphone. :) Maligayang pananahi!

Ulan at Bahaghari / Rain and Rainbow (board game)

Isang maulang umaga ang bumungad sa akin ngayon. Iniisip ko pa man ding pumunta ng Divisoria o ng Cubao. Kaya heto, parang sinasadya ng panahon na bumalik uli ako sa pag-DIY.

Nakuha ko ang inspirasyon para sa board game na ito dito. Pero sa halip na i-print ko lahat ng kailangan sa board game, nag-water color painting na lang ako.

Mga materyales:
• (1) 10" x 10" illustration board
• (1) 10" x 10" cartolina (puti)
• (1) card paper (para sa bahaghari at sa mga tauhan ng board game)
• watercolor paint at brush

Paraan ng paggawa:

Ang larong ito ay kagaya ng Snakes & Ladders.

1. Gumawa ng tig-2" na mga parisukat pahalang at pahaba sa cartolina. Pintahan ng kulay asul ang isang parisukat at lagpasan ang bawat kasunod nito.

2. Gumuhit ng ulap at ulan at kulayan ito ng itim.

3. Gumupit ng 1" x 8.5" na strip mula sa card paper. Kulayan ito ng mga kulay ng bahaghari (ROYGBV=red, orange, yellow, green, blue, violet).

4. Gumawa ng lusutan ng bahaghari sa cartolina gamit ang cutter. Pagkalusot ng isang dulo ng bahaghari, idikit ito sa ilalim gamit ang glue para masigurong hindi matatanggal mga bahaghari kapag naglaro na sa board na ito. Kapag naikabit na lahat ng bahaghari, idikit ang cartolina sa illustration board.

5. Sa paggawa naman ng tauhan: gumupit ng 1" x 7" strip mula sa card paper. Sukatin ang gitna nito at guhitan ng tatsulok na tenga. Gupitin ang tatsulok maliban sa base nito saka tupiin.

6. Itupi ang bawat dulo ng mga isa hangang isa't kalahating pulgada at saka pagdikitin.

7. Guhitan ng mata saka ito kulayan.

8. Para mas makulay pa, gumamit ako ng gold glitter glue para sa mga numero sa bawat parisukat.

Roll the dice at simulan na ang paglalaro ng Ulan at Bahaghari. Maligayang weekend!

Sugar skull

Kamusta? Paggising ko kaninang umaga ay binati ako ng malamig na simoy ng hangin. Amoy Pasko na sa amin! Pero pinipigilan ko pa ang sarili kong ilabas ang mga palamuti naming pam-Pasko. Kaya naman kanina ay naisipan kong gumawa ng madaling proyektong bagay naman sa nalalapit na Araw ng mga Patay.

Hindi ako lumaki sa tradisyon ng Halloween. Basta kapag sasapit ang ika-1 at 2 ng Nobyembre ay nagtitirik kami ng kandila sa labas ng bahay at tahimik na ipinagdadasal ang mga sumakabilang buhay naming kamag-anak. Madalas din ay dinadalaw namin sila sa sementeryo. Hindi ko sila lubos na kilala. Simula ng magkamalay ako ay wala na akong kinagisnang mga lolo at lola kaya naman ang mga ipinagtitirik namin ng kandila ay para bang ginagawan ko na lang ng kwento sa isipan ko. Nagpapakwento ako sa Mama ko kung anong klaseng mga magulang ang mga lolo at lola ko, kung paano ang buhay nila noon, kung paano sila namatay.

Nung una, para sa'kin ang sugar skull ay isang magandang uri ng sining. Pero naisipan kong alamin ang pinanggalingan nito para lubos ko ring maintindihan kung bakit ito ginagawa. (Para sa kwento ng sugar skull, maaari nyo 'tong i-google o kung may kaibigan kayong Mexicano o sadyang mahilig lang sa sugar skull, magpakwento na lang kayo sa kanila. Hehe!) Ngayon mas naiintindihan ko na kung bakit ito makulay at mukang isang masayang bungo: dahil ang masayang kaluluwa ng ating mga namayapa ay nangangahulugan din ng masayang pamumuhay nating mga nabubuhay pa.

Ang orihinal na sugar skull ay gawa talaga sa asukal. Pero dahil wala akong maraming asukal sa ngayon at ayokong makakita ng mahabang pila ng mga langgam sa bahay namin kaya minabuti kong gumawa na lang sa papel.

Ang mga materyales na ginamit ko:
• Cartolina
• Crepe paper (iba't ibang kulay)
• Scotch tape
• Poster paint at paint brush
• Lapis
• Gunting
• Tali

Paraan ng paggawa:
1. Para sa mga bulaklak natin, pumutol ng mga 1 o hanggang 2 pulgadang kapal at mga 2feet na haba ng crepe paper. Simula sa isang dulo nito, lukutin ang ilalim na bahagi habang iniikot ito. Pag natapos na ay gumamit ng scotch tape para manatiling magkakasama ang ilalim na bahagi ng bulaklak.

2. Sa cartolina, gumuhit ng isang malaking bungo saka ito gupitin.

3. Sa taas na bahagi ng bungo ay dikitan ito ng mga papel na bulaklak na para bang meron syang suot supil na bulaklak.

4. Pintahan ang mukha ng bungo gamit ang poster paint (o pwede din namang ibang pangkulay). Kinuha ko ang inspirasyon sa kalendaryo kong ito na sining ni Thaneeya McArdle. Katulong ko ang anak ko sa pagpipinta. Siya ang nagsasabi sa'kin kung ano'ng kulay ang gagamitin sa mata o sa ilong o sa mga ngipin ng aming bungo. Ang tawag nya dito ay "'Ganda ng Takot" (Scary Beautiful).

5. Inilinya ko ang natirang mga bulaklak na papel sa isang tali para magsilbing palamuti sa paligid ng aming "sugar skull".

Hindi man mukhang pang-Halloween ang aming palamuti sa bahay pero siguradong masisiyahan naman ang mga namayapa naming kamag-anak sa nais na ipahatid ng sugar skull na ito.

Ang malambot na elepante / The soft elephant

Eto ang unang beses kong gumawa ng isang plushie. Syempre umisip muna ko ng madaling gawin. At naisip kong gumawa ng elepante.

Karamihan sa mga telang ginagamit ko ay galing sa mga lumang damit na di ko na nasusuot. Kaya naman karaniwang nalilimitahan ako sa sukat ng gagawin kong proyekto. Pero dahil din dun kaya ako na-cha-challenge na mag-isip ng kung ano lang ang meron ako sa ngayon.

Ang mga materyales na ginamit ko dito ay:

• Tatlong klase ng tela (pero pwede din namang dalawa o isa lang, depende sa gusto nyong kalabasan)

• Fiberfill (malambot na inilalagay sa loob ng stuffed toys o plushies)

• Butones para sa mga mata

• Sinulid at karayom

Paraan ng paggawa:

1. Gumawa ng pattern. Maraming libreng pattern sa internet pero pwede ka ring maging imaginative at gumawa ng sarili mong pattern.

2. I-pin ang pattern sa tela at sundan ito sa paggupit. Maglaan ng mga 0.25" na layo mula sa pattern bilang palugit sa pagtatahi.

3. Tahiin ang mga tela. Mag-iwan ng butas upang maibaligtad ang tela. Pagkabaligtad ay lagyan ng fiberfill ang loob.

4. Ikabit ang mga tenga.

5. Itahi ang mga mata ng elepante.

Marahil ay gagawa pa'ko ng ilan pang plushie para sa ilang batang reregaluhan ko ngayong Pasko. Oo, ako na si Santa! :P

Ano kayang magandang ipangalan sa kanya?

Tote bag

Matagal ko ng naihanda ang mga telang gagamitin ko para sa tote bag na ito. Pero palagi kong inisasantabi ang proyektong 'to kasi gusto ko sanang naka-rivets ang hawakan. Sa kasamaang palad ay hindi ako makahanap ng kailangan kong rivets para dito kaya pinagpasyahan ko na lang na tahiin ang mga hawakan sa bag. Nakuha ko ang inspirasyon dito.

Ang mga materyales na ginamit ko ay:

• Dalawang klase ng tela (yung sa'kin ay isang chevron canvas at isang manipis na tela para sa lining)
• Leather strap (na nakuha ko naman mula sa lumang bag ko na bumigay na matapos ang ilang taong pag-abuso paggamit ko dito)
• Gunting
• Sinulid at karayom (tinahi ko 'to gamit na naman ang mga kamay ko lamang dahil mas tiwala ako dito kesa sa makina ko)

Paraan ng paggawa:

1. Gumupit ako ng kaparehong sukat mula sa blog na pinag-gayahan ko ng bag: 30cm x 82cm (kasama na ang pa-sobra sa gilid na tatahiin).

2. Magkabukod munang tahiin ang dalawang tela na nakabaliktad.

3. Matapos tahiin ay gumawa ako ng tatsulok sa magkabilang dulo ng ilalim na bahagi ng bag. Mga dalawang pulgada (2") ang "taas" ng tatsulok.

4. Sa puntong ito meron na tayong dalawang "bag": isang canvas at isang pang-lining. Baligtarin ang lining para ang nakikita sa labas ay yung "malinis" na bahagi. Tapos ipasok ito sa canvas bag (na hindi natin babaligtarin).

5. Tahiin ang taas na bahagi ng bag pero mag-iwan tayo ng mga anim na pulgadang butas para mabaligtad natin ang bag.

6. Mula sa butas ay baligtarin ang bag. Pagkabaligtad, ipasok na ang lining sa loob ng canvas bag tsaka tahiin ang butas.

7. Yung leather strap na nakuha ko ay may tahi na sa gilid kaya sinundan ko na lang ito para maitahi ito sa bag.

Masaya ako na natapos ko din ang proyektong ito. Isa ito sa listahan ko ng DIY na ipanreregalo ko sa darating na Pasko. Masayang pag-DIY sa ating lahat!

Bahay na karton / Carton house

May dalawa akong anak at pareho silang babae. Pero hindi tadtad ng kulay rosas ang bahay namin. Wala din silang koleksyon ng Barbie at Hello kitty. Mas nahilig sila sa mga umaandar na laruang kotse at sa mga dinosaurs at dragons.

Ngayong hapon naisipan ko namang turuan ang panganay kong anak kung paano gumawa ng bahay gamit lang ang karton nya ng gatas.

Eto ang mga ginamit namin:

Ginupit ko lang yung mga takip sa taas at baba. Tapos, ginupit ko yung isang kanto para mailatag ko yung karton.

Gumuhit ako ng bintana at pintuan tsaka ko ito ginupit. Dahil yung may print ang nasa loob ng "bahay" dinikitan ko 'to ng telang bulaklakin na pinili ng anak ko. Tapos gumupit din ako ng kapirasong tela bilang kurtina sa bintana. Naglagay ako ng maliit na bangko sa loob at "TV" na hiling ng anak kong ilagay din sa loob ng bahay. Gumupit uli ako mula sa isa pang karton para sa bubong ng bahay.

Isang masayang bonding naming mag-ina at paraan ko na rin para maiiwas sya sa ipad at TV.

Natuwa ang bata (oo, pati din akong nanay) sa aming bagong bahay.